लासमा समेत बार्गेनिङ, ९० रूपैयाँमा किनेको औषधी ८ हजारमा बिक्री

समाचार

काठमाडौं- जिल्ला प्रहरी कार्यालय पर्साको विशेष टोलीले शनिबार दुईवटा एम्बुलेन्स र चालकलाई नियन्त्रणमा लियो। ना २ च ३२५६ र ना २ च ८१९९ नम्बरको एम्बुलेन्स चालकद्वय वीरवल मुखिया र कमरुदिन रायभर वीरगञ्जस्थित नेशनल मेडिकलको प्रांगणबाट पक्राउ परे। उनीहरुले कोरोना भाइरस संक्रमणबाट मृत्यु भएका व्यक्तिको शव बोक्ने क्रममा बार्गेनिङ गरेका थिए।

शव बोक्न प्रचलित मूल्यभन्दा तेब्बर मूल्य लिएपछि उनीहरुलाई नियन्त्रणमा लिइएको पर्सा प्रहरीका प्रवक्ता, डीएसपी ओमप्रकाश खनालले बताए। पक्राउ परेका दुवै जनाविरुद्ध कालोबजारी सम्बन्धी कसूरमा प्रहरीले अनुसन्धान अघि बढाएको छ। यी एम्बुलेन्स चालकद्वयले कोरोनाका बिरामी र मृतक बोक्ने क्रममा तेब्बर भन्दा बढी रकम असुल्दै बिरामी र मृतक बोक्ने गरेको प्रहरीको भनाइ छ।

यी दुई जनाले तेब्बरसम्म लिएपनि यही महामारीलाई मौका छोप्दै ५ सय गुणसम्म असुली गरेको पाइएको छ। वैशाख २३ गते महानगरीय ट्राफिक प्रहरी महाशाखाबाट सादा पोशाकमा खटिएको प्रहरी टोलीले ५ सय प्रतिशतसम्म बढी भाडा असुलेको आरोपमा तीन जनालाई पक्राउ गर्‍यो। काठमाडौंबाट बुटवल र पोखरा जाने यात्रुसँग ५ सय प्रतिशतसम्म बढी भाडा असुलेको पाइएपछि पोखरा चल्ने माइक्रोमा काम गर्ने बन्दराज पराजुली, नवीन पौडेल र बुटवल काउन्टरमा काम गर्ने रन्जित सिलवाल पक्राउ परे।

काठमाडौं–पोखराको नियमित भाडा ५ सय भए पनि उनीहरुले ३५ सयसम्म लिए। काठमाडौं–बुटवलको भाडा १२ सय भए पनि उनीहरुले ५ सय प्रतिशत बढी असुल्दै ६ हजार लिए। महाशाखाका एसएसपी जनक भट्टराईका अनुसार जारी निषेधाज्ञामा बढी भाडा असुल्ने ३३ जनालाई ट्राफिक महाशाखाले पक्राउ गरिसकेको छ।

कोरोना महामारीका कारण नागरिकको दैनिक जनजीवन अस्तव्यस्त भइरहेका बेला केही व्यक्तिलाई यो अवसर बनेर आएको छ। यही मौकामा उनीहरु कृत्रिम कालोबजारी सिर्जना गर्नेदेखि नक्कली सामान बजार पठाएर ठगी गर्दै आएका छन्। कतिसम्म भने कोरोनाको उपचारमा लाग्ने औषधी नक्कली बनाएर बजार पठाउनेसम्मका आपराधिक कार्य भएका छन्।

मोरङ प्रहरीले कोरोनाको उपचारमा प्रयोग हुने रेम्डेसिभिर भनेर स्टासेफ औषधी बेच्ने दुई जनालाई पक्राउ गरेकोे थियो। विराटनगर-४ मा रहेको साथी मेडिकल पसलका सञ्चालक सोनु आलम र श्रवणकुमार यादव पक्राउ परेका थिए। ९० रुपैयाँमा खरिद गरेको स्टासेफ औषधीमा रेम्डेसिभिरको स्टिकर टाँसेर ८ हजार रुपैयाँसम्म लिएर उनीहरुले बिक्री गरेको मोरङका एसपी सन्तोष खड्का बताउँछन्।

भारतको पटनाबाट रेम्डेसिभिरको स्टिकर ल्याएर उनीहरुले स्टासेफ औषधीमा टाँस गर्दै रेम्डेसिभिर भन्दै बेच्दै आएका थिए। कोरोनाका गम्भीर विरामीको ज्यान जोगाउन प्रयोग गरिने औषधीमा समेत उनीहरुले गम्भीर खेलवाड गरी नक्कली औषधी बेच्ने गरेको पाइएपछि कालोबजारीसँगै केही सामाजिक अपराध तथा सजाय ऐन अन्तर्गतको कसूरमा उनीहरुमाथि प्रहरीले अनुसन्धान गरिरहेको छ।

महामारीलाई मौका ठान्नेहरुका लागि कालोबजारी

Leave a Reply

Your email address will not be published. Required fields are marked *