पति-पत्नी सँगै अस्पताल भर्ना, तीन दिनको फरकमा मृत्यु

समाचार

१० जेठ, जनकपुरधाम । धनुषामा एकै पटक बिरामी भई सँगै अस्पताल भर्ना भएका एक दम्पतीको तीन दिनको अन्तरालमा मृत्यु भएको छ । क्षिरेश्वरनाथ नगरपालिका–९ स्थायी घर भई वडा नम्बर ५, महेन्द्रनगरमा बस्दै आएका दम्पतीको जनकपुरधामस्थित काव्या अस्पतालमा एकै पटक मृत्यु भएको हो ।

मृत्यु हुनेमा ५५ वर्षीय श्यामकिशोर सिंह र उनकी पत्नी ४८ वर्षीया मालती देवी सिंह छन् । श्यामकिशोरको आइतबार राति र मालतीको बिहीबार दिउँसो एकै अस्पतालमा मृत्यु भएको क्षिरेश्वरनाथ नगरपालिका–९ का वडाध्यक्ष अशोक चौधरीले जानकारी दिए ।

उनका अनुसार उनीहरु आफ्नी छोरीको विवाहको तयारीमा जुटेका थिए । सोमबार (आज) यी दम्पतीको एक मात्र छोरीको विवाह हुने तय भएको थियो । विवाहको तयारीमा लागेकै बखत दुवैलाई रुघाखोकी र ज्वरो आएको थियो । त्यस क्रममा दुवैले औषधि किनेर खाएका थिए ।

दुई साताअघि बिरामी परेका दुवैलाई औषधिले सन्चो नभएको र सास फेर्न कठिनाइ भएपछि एकै पटक जनकपुरधामस्थित काव्या अस्पताल पुगेको वडाध्यक्ष चौधरीले बताए । उपचारकै क्रममा तीन दिनको फरकमा दम्पतीको मृत्यु भएको उनले बताए ।

मृतक श्यामकिशोर जनता आधारभूत औरहका पूर्व प्रधानाध्यापक थिए । सेवानिवृत्त भएर घरमै बस्दै आएका उनका जेठा छोरा अमेरिकामा छन् भने कान्छा छोरा र छोरी घरमै बस्दै आएका थिए ।

Leave a Reply

Your email address will not be published. Required fields are marked *